ورځنۍ چارې

د بي بي عایشه د لوړو زده کړې موسسې څېړنیز مرکز د دې موسسې کتابتون ته ۱۲۳ جلده کتابونه ډالۍ کړل.

په دغه کتابونو کې ادبي، فلسفي، طبي او د نورو علومو  کتابونه شامل دي چې دا به د یادې موسسې محصلانو، کارکوونکو او استادانو ته د کتابتوني څېړنې په برخه کې لا زیاتې اسانتیاوې رامنځته کړي.

د بي بي عایشه د لوړو زده کړو موسسه اوسمهال نږدې شپږ زره جلده کتابونه لري چې د دغه موسسې محصلان او له موسسې بهر د مطالعې مینه وال او څېړونکي کولی شي ګټه ترې واخلي او د علم د ترویج په برخه کې خپل مسولیت ادا کړي، ځکه چې  د ټولنې هر وګړی د مطالعې د کلتور د ودې او پراختیا  مسوولیت پر غاړه لري. کتاب لوستلو ته د ځوانانو هڅول، د مطالعې د کلتورعامول او د عامه کتابتونونو بډایه کول ټولې هغه کړنې دي چې د خلکو علمي کچه او پوهه لوړوي او ټولنه د پرمختګ لور ته بیايې.

بي‌بي عایشه د لوړو زده کړو موسسې په دغه ستر فرهنګي ډګر کې په صادقه ډول خپلو محصلینو، استادانو او د علم او مطالعې ټولو مینه والو ته زمینه برابره کړې چې د یادې موسسې له مجهز کتابتون څخه ګټه واخلي، مطالعه اوکړي، څېړنې وکړي او د ټولنې په پرمختګ کې ونډه واخلي.

د یادې موسسې اغلې رییسې، علمي مرستیالې او د کتابتون مدیرې د کتابتون د بډاینې کولو لپاره د څېړنیز مرکز له هڅو او مرستو مننه او قدراني وکړه او د لا زیاتو همکاریو هیله يې څرګنده کړه.